ខេត្តកំពត៖ បើតាមប្រភពព័ត៌មានពីស្នងការដ្ឋាននគរបាលខេត្តកំពតឱ្យដឹងនៅព្រឹកថ្ងៃអាទិត្យ ទី១៧ ខែមីនានេះថា ហេតុការណ៍ភ្លើងឆេះព្រៃក្នុងឧទ្យានជាតិព្រះមុនីវង្ស (បូកគោ) បានរលត់ទៅវិញទាំងស្រុងហើយ។ បើតាមប្រភពព័ត៌មានដដែលបានបញ្ជាក់ថា ផលប៉ះពាល់បណ្ដាលមកពីហេតុការណ៍អគ្គិភ័យនេះបានបង្កឱ្យមានការខូចខាតដំណាំ និងព្រៃឈើប្រហែល ៤០ហិចតា ក៏ប៉ុន្តែមិនបណ្ដាលឱ្យគ្រោះថ្នាក់ដល់អាយុជីវិត និងលំនៅដ្ឋានរបស់ប្រជាពលរដ្ឋឡើយ។
គួរបញ្ជាក់ថា កាលពីល្ងាចថ្ងៃសៅរ៍ម្សិលមិញនេះ មានហេតុការណ៍ភ្លើងឆេះព្រៃមួយបានកើតឡើងនៅជួរជើងភ្នំបូកគោ ដែលប្រភពពីសមត្ថកិច្ចអះអាងថាហេតុការណ៍ភ្លើងឆេះនេះបណ្ដាលមកពីអាកាសធាតុក្ដៅខ្លាំងពេក។ មិនត្រឹមតែប៉ុណ្ណោះ កម្លាំងជំនាញនៃស្នងការដ្ឋាននគរបាលខេត្តកំពតក៏បានប្រកាសពីការត្រៀមជួយប្រជាពលរដ្ឋនៅគ្រប់ស្ថានការណ៍ផងដែរ រហូតដល់ភ្លើងរលត់ទាំងស្រុងវិញនៅព្រឹកនេះ៕
